პროდუქციის დაბრუნების ბოროტად გამოყენების მასობრივი ტენდენცია

პროდუქციის დაბრუნების ბოროტად გამოყენება მასობრივ ტენდენციად იქცა, ვინაიდან მომხმარებელთა თითქმის ნახევარი დაბრუნების მოთხოვნისას ხელოვნურ ინტელექტს იყენებს, იუწყება Riskified-ის ახალი კვლევა.

გლობალური ელექტრონული კომერციის თაღლითობის გამოვლენისა და რისკების ანალიტიკის ლიდერმა კომპანიამ, Riskified-მა, გამოაქვეყნა ახალი გლობალური ანგარიში - „დაბრუნების წესების ხელახალი გააზრება“, რომელიც ხელოვნური ინტელექტის ეპოქაში მომხმარებელთა დამოკიდებულებებსა და ქცევებს შეისწავლის. Riskified-ის დაკვეთით, eTailInsights-ის მიერ ჩატარებული კვლევა ეფუძნება შვიდ ქვეყანაში 2 091 მომხმარებლის გამოკითხვასა და მსხვილი საცალო კომპანიების ხელმძღვანელებთან ინტერვიუებს.

კვლევის მიხედვით, მომხმარებელთა 50% იყენებს გენერაციულ ხელოვნურ ინტელექტს, მათ შორის ChatGPT-სა და Claude-ს, დაბრუნების ან თანხის ანაზღაურების მოთხოვნების შესადგენად. რითეილერების შეფასებით, მომხმარებლები ხელოვნურ ინტელექტს უფრო დამაჯერებელი და ზუსტი მოთხოვნების შესაქმნელად იყენებენ, რაც კომპანიებზე დამატებით წნეხს ქმნის.

ამავდროულად, დაბრუნების პოლიტიკის ბოროტად გამოყენება სულ უფრო მეტად ნორმალიზდება. მომხმარებელთა 46% მისაღებად მიიჩნევს ნივთის დაბრუნებას, თუ ის რეალურად სხვანაირად გამოიყურება, ვიდრე ინტერნეტში; 42% - რამდენიმე ზომის ან ფერის ნივთის შეძენას წინასწარი განზრახვით, რომ მათი უმეტესობა დააბრუნოს; ხოლო 24% მისაღებად მიიჩნევს ნივთის გამოყენებას და შემდეგ მის დაბრუნებას.

სოციალური მედიაც მნიშვნელოვან როლს ასრულებს: მომხმარებელთა ნახევარზე მეტი დაბრუნებასთან დაკავშირებულ კონტენტს ხვდება, მათ შორის ე.წ. „ლაიფჰაკებსა“ და არაოფიციალურ სახელმძღვანელოებს. მთლიანობაში, მომხმარებელთა 85% მისაღებად მიიჩნევს დაბრუნების სტრატეგიული ან ზღვრული ქცევის მინიმუმ ერთ ტიპს.

ამ გამოწვევაზე საპასუხოდ, ბევრი რითეილერი დაბრუნების პოლიტიკას ამკაცრებს — ამცირებს დაბრუნების ვადებს, ზღუდავს მიზეზების კატეგორიებს, ნაღდი თანხის ნაცვლად მაღაზიის კრედიტს სთავაზობს მომხმარებლებს და აძლიერებს შემოწმებისა და ხარისხის კონტროლის პროცესებს. ამასთან, 52% მომხმარებლისა მხარს უჭერს უფრო მკაცრ პოლიტიკას, ხოლო 56% უპირატესობას პერსონალიზებულ ან მრავალდონიან მიდგომას ანიჭებს.

Riskified-ის მარკეტინგის ხელმძღვანელი ჯეფ ოტო აღნიშნავს, რომ გენერაციული ხელოვნური ინტელექტის გავრცელებამ დაბრუნების ლანდშაფტი ფუნდამენტურად შეცვალა. მისი თქმით, რითეილერებს სჭირდებათ ისეთი დიფერენცირებული მიდგომები, რომლებიც ლოიალურ მომხმარებლებს გაამარტივებს პროცესს, ხოლო წესების ბოროტად დამრღვევთა მიმართ მკაცრ კონტროლს უზრუნველყოფს.

ანგარიშში მოყვანილია გლობალური მდიდრული მოდის ბრენდის მაგალითიც, რომელიც Riskified-ის პლატფორმას იყენებს თაღლითობისა და დაბრუნების პოლიტიკის ბოროტად გამოყენების გამოსავლენად. კომპანიის განცხადებით, ამ მიდგომამ ჩარჯბექების დაახლოებით 75%-იანი შემცირება და კონვერტაციის 50%-დან 75–80%-მდე ზრდა უზრუნველყო. უარყოფილი დაბრუნებებით გამოწვეული ჩარჯბექებიც წლიურად 1 მილიონი დოლარიდან 150–200 ათას დოლარამდე შემცირდა.

ანგარიშის მიგნებები მიუთითებს ელექტრონული კომერციის დაბრუნების ახალ ეტაპზე, სადაც სულ უფრო მნიშვნელოვანი ხდება ხელოვნური ინტელექტით მართული რისკების გამოვლენა, პერსონალიზებული დაბრუნების პოლიტიკა და ხარჯების მეტი გამჭვირვალობა. წარმატებას მიაღწევენ ის მოვაჭრეები, რომლებიც შეძლებენ ლოიალური მომხმარებლებისა და ბოროტად გამოყენების ქცევის ერთმანეთისგან გამიჯვნას და ამავდროულად მომხმარებლისთვის მოსახერხებელი გამოცდილების შენარჩუნებას.